The news is by your side.

Lagarde, si shefe e Bankës Europiane në një moment të trazuar

Christine Lagarde, Presidentja e ardhshme e Bankës Qendrore Evropiane duket se nuk ka frikë nga  konfliktet. “Debati, kundërshtimi dhe argumenti, janë të gjitha të nevojshme dhe të shëndetshme.” është shprehur ajo në një intervistë të fundit.

Lagarde, ish-shefe e Fondit Monetar Ndërkombëtar, pritet të marrë zyrtarisht detyrën e re në 1 nëntor dhe bashkë me të edhe shumë përgjegjësi në rritje. Paraardhësi i saj, Mario Draghi, ka lëshuar një paralajmërim të qartë: Banka Qendrore, e cila ka ulur normat e interesit në kufijtë historike dhe ka rifilluar programin e saj të blerjes së bonove, po arrin nivelet e mundshme të asaj që mund të bëjë për të stimuluar ekonominë e ngadalësuar të rajonit. Prandaj, sipas Draghit, është koha e duhur që edhe qeveritë të hynë në lojë, për të stimuluar rritjen.

Ndërkohë, mosmarrëveshjet brenda radhëve të Bordit të Bankës Qendrore po rriten. Më shumë se një e treta e anëtarëve të ekipit udhëheqës kundërshtuan vendimin e bankës, në fillim të këtij muaji për të shtypur para për një afat të pacaktuar, me qëllim blerjen e aseteve financiare. Nga ana tjetër, javën e kaluar, Sabine Lautenschläger, përfaqësuese e Gjermanisë në bordin ekzekutiv të Bankës Qendrore dhe kundërshtare e hapur e politikave të Draghit dha papritmas dorëheqjen.

Ndaj duket se drejtuesja e re e institucionit më të rëndësishëm të politikave monetare në kontinent, po merr pozicionin në një moment tepër kritik. Si do t’i zgjidhë ajo të gjitha këto dhe çfarë mendon rreth situatës aktuale?

E pyetur nga gazatarët Lagarde është shprehur: “Eshtë mirë që ka mendime të ndryshme. Nëse do të kishte unanimitet dhe konsensus, do të mungonte debati, i cili është aq i nevojshëm dhe produktiv, për rrjedhën e gjërave.”

Lagarde, e cili ka shërbyer edhe si Ministre e Financave të Francës përpara se të transferohej në FMN, pranoi se ka “shumë pyetje rreth asaj që po ndodh në këtë moment” në lidhje me rrugën më të mirë që duhet të ndjekin Bankat Qendrore. Ajo gjithashtu është shprehur se është përgjegjësia e saj për t’i bërë njerëzit bashkë dhe duke diskutuar e ndarë mendime me profesionistë, merren vendime më të mira në dobi të të gjithëve.

/ Burimi: CNN

Gliqeri Riza

Leave A Reply

Your email address will not be published.