The news is by your side.

Ambasadorja gjermane kritika qeverisë: Kërkohet siguri, transparencë, jo korrupsion

Ambasadorja gjermane, Susanne Schutz, shpreh kritika të forta lidhur me kushtet që Shqipëria u ofron investitorëve të huaj. Gjatë fjalës së saj në pritjen e përvitshme të Shoqatës Gjermane të Industrisë dhe Tregtisë, diplomatja tha se sipërmarrjet kërkojnë më shumë siguri dhe ministri që nuk janë të korruptuara.

Schütz, tërhoqi vëmendjen te nevoja e forcimit të shtetit të së drejtës, te ulja e korrupsionit e adresimi i çështjes së pronës, për të rritur interesin e investitorëve të huaj. Ajo tha se vitin e shkuar ka pasur biznese gjermane që donin të largoheshin, dhe se Shqipëria duhet të vijojë me vetting-un dhe reformat e tjera për të bindur Evropën për çeljen e negociatave.

Investitorët dëshirojnë të dëgjojnë histori suksesi nga sipërmarrje, të cilat janë tashmë prezente në tregun shqiptar. Ajo çka kërkojnë investitorët në Shqipëri është: siguri ligjore, transparencë dhe një administratë mirëfunksionale, efektive dhe jo të korruptuar. Për fat të keq, shpesh investitorët gjermanë dhe të huaj, të cilët kanë tashmë përvojë në tregun shqiptar, kanë shprehur kohët e fundit dyshime serioze dhe shqetësime të shtuara në lidhje me një mjedis jo “fair” dhe solid në sektorin e ekonomisë në Shqipëri.” – tha Susanne Schutz.

Për problem me gjyqësorin e konkurrencën e lirë foli edhe Presidentja Dhomës Gjermane të Industrisë dhe Tregtisë, Stephanie Sieg. Presidentja e DIHA-s u ndal tek fenomeni i emigracionit duke theksuar se është momenti të tregohet kujdes në përmirësimin e kushteve në vend, me qëllim që të frenohet vrulli i emigracionit që po përjeton vendi .

Si një shoqatë që ka në fokus të saj, përmirësimin e kushteve ekonomike, të cilat janë bazë për nxitjen e investimeve, tregtisë dhe shërbimeve në Shqipëri, si dhe zhvillimin e marrëdhënieve bilaterale ekonomike ndërmjet Shqipërisë dhe Gjermanisë, DIHA ndjek me vëmendje zhvillimet në vend dhe ofron mbështetjen e saj për përmirësimin e klimës së biznesit në Shqipëri. Lufta kundër problemeve si korrupsioni, burokracia, papunësia duhet të jetë prioritet i përbashkët i Qeverisë, biznesit dhe të gjithë shoqërisë” – tha Stephanie Sieg.

Të pranishëm në takim ishin edhe përfaqësues të qeverisë dhe biznesit të huaj e vendas, ku Ministrja e Financave Anila Denaj vlerësoi mbështetjen e Gjermanisë duke nënvizuar se është një nga 7 investitorët më të mëdhenj në vend, me një portofol prej 123 milionë euro.

Leave A Reply

Your email address will not be published.