The news is by your side.

10 ekonomitë më konkurruese në botë- kryeson Singapori, por kush përfshihet në renditje?

Sipas të dhënave më të fundit nga Forumi Ekonomik Botëror(WEF), Singapori ka kapërcyer SHBA dhe aktualisht renditet si vendi i parë me ekonominë më konkurruese në botë. Në Raportin Global të Konkurrencës për vitin 2019, WEF mati plot 103 tregues kryesorë, që nga inflacion apo papunësia e deri tek aftësitë teknologjike dhe tarifat tregtare të vendeve, në 141 shtete.

Treguesit kryesorë në raport organizohen në 12 shtylla, që përfshijnë institucionet, stabilitetin makroekonomik dhe shëndetin e ekonomisë. SHBA, e cila mbante vendin e parë në renditjen e vitit 2018, ra në vendin e dytë këtë vit, duke u tejkaluar nga Singapori, megjithëse autorët e raportit theksojnë se pavarërisht kësaj, SHBA mbetet një qendër energjie dhe inovacioni.

Amerika regjistroi rezultatin më të lartë në botë në disa nënkategori, duke përfshirë lehtësinë e gjetjes së punonjësve të aftë dhe disponueshmërinë e kapitalit të sipërmarrjes. SHBA gjithashtu u rendit më  lart se çdo vend tjetër në shtyllën e dinamizmit të biznesit.

Sidoqoftë, vendi shënoi vlera relativisht të ulëta në disa kategori, me rritjen e tarifave tregtare, rënien e jetëgjatësisë dhe aftësive më të ulëta digjiitale. Kështu Forumi Ekonomik vuri në dukje se jetëgjatësia në SHBA tani është më e ulët se ajo në Kinë.

Singapori, ekonomia më konkurruese në botë, nga ana tjetër, shënoi rritje në sektorin e saj publik, forcën e punës, diversitet dhe infrastrukturë. Edhe për jetëgjatësinë, Singapori u rendit në vendin e parë, me fëmijë të porsalindur që pritet të jetojnë deri në moshën 74 vjeç. Për krahasim, jetëgjatësia në SHBA është 66 vjeç, ndërsa në Kinë 68.

Kështu, nga raporti rezultoi se 10 vendet me ekonomitë më konkurruese në botë janë:

  1. Singapori
  2. Shtetet e Bashkuara
  3. Hong Kong-u
  4. Holanda
  5. Zvicra
  6. Japonia
  7. Gjermania
  8. Suedia
  9. Mbretëria e Bashkuar
  10. Danimarka

Siç shihet, në renditjen e këtij viti, Hong Kongu, Hollanda dhe Zvicra arritën të renditen ndër pesë të parët, por nëse për Holandën dhe Zvicrën rezultati ishte disi i pritshëm, Hong Kongun ka ngjallur diskutime, pasi është renditur 4 vende më lart krahësuar me 2018. Kjo ndoshta për vetë faktin se mbledhja e të dhënave të WEF përfundoi përpara se trazirat politike dhe protestat pro demokracisë të intensifikoheshin.

Në përgjithësi, Azia rezultoi rajoni më konkurrues në botë, i ndjekur nga Evropa dhe Amerika e Veriut. Vlerësimi i konkurrueshmërisë bëhet në bazë pikësh deri në 100 të tilla. Nga 141 vende marrë në shqyrtim, rezultati mesatar i vitit aktual ishte 61 pikë. Singapori i vendit të parë shënoi 84.8 pikë, ndërsa SHBA-ja e vendit të dytë 83.7. Hendeku dhe niveli relativisht i ulët edhe tek vendet e kreut të renditjes, sipas WEF erdhi si pasojë e hendekut të madh ekonomik dhe ngadalësimit të rritjes globale.

/ Burimi: CNBC

Gliqeri Riza

Leave A Reply

Your email address will not be published.